पोस्ट धल:
उसाँय्
श्वेता रक्तदान अभियानं प्यद्वःसिबें अप्वः प्याकेट हि मुंकल
सिन्धुपाल्चोक । वंगु काैलागा ७ शनिबार कुन्हु तक चौतारा सांगाचोक गढि नगरपालिका वडा नं. ९ दुने श्वेता रक्तदान अभियानं प्यद्वःसिबें अप्वः प्याकेट हि मुंकूगु दु ।
थ्यंमथ्य स्वदँ न्ह्यवंनिसें स्वास्थ्य क्षेत्रय् विशेष सेवा बिइगु आज्जुं हिदान अभियान न्ह्याकाच्वंगु संस्था श्वेता रक्तदान अभियानया अभियन्ता श्वेता श्रेष्ठया कथं थौंतक्क स्वसः सिबें अप्वः हिदान ज्याझ्वः यायेधुंकल । थौंकन्हय् हि म्ह्वः जूगुलिं हिदान ज्याझ्वलय् तीब्रता हयागु खँ अभियन्ता श्रेष्ठं कनादिल ।
वकुन्हु नं हि मुंकेत नेपाल रेडक्रश सोसाइटी ख्वपया प्राविधिक ग्वाहालिइ, स्थानिय युवा अनिल लामाया सहजिकरण, रिभर बे बीच रिसोर्ट – सुकुटेया महेन्द्र श्रेष्ठ, सिन्धु पर्यटन व्यवसायी संघ या नायः नारायण श्रेष्ठ , श्री नवप्रतिभायुवा क्लब बलेफीया नायः राजु श्रेष्ठ व रक्तदाता अभियान्तापिनिगु विशेष ग्वाहालिइ हिदान ज्याझ्वः जूगु खः ।
ज्याझ्वलय् युवावर्गया उत्साहजनक सहभागी जूगु ग्वसाखलकं धाःगु दु ।
स्वनिगः
प्रादेशिक भाषा ऐेन लागू जूगु लसताय् बैशाख २४ गते सार्वजनिक बिदा
३ नं प्रदेश सरकारं स्वता भासं साइनबोर्ड तइगु
नेसं. ११४४ चौलाथ्व पुन्हि, हेटौंडा । थौं च्वंगु ३ नम्वर प्रदेशया मन्त्रिपरिषद्या मुँज्यां भाषा ऐन आ:वइगु बैशाख २४ गतेनिसें कार्यान्वयनय् वइगु जूगुलिं फुक्कं प्रदेश सरकार ज्याकुथी नेपालभाषा व तामाङ भासं नं साइनबोर्ड तयेगु क्वछ्यूगु दु ।
व हे मुँज्यां भाषा विधेयक कार्यान्वयनय् वइगु वकुन्हु ३ नम्वर प्रदेशन्यंकं सार्वजनिक बिदा बिइगु नं क्वछ्यूगु दु । वकुन्हु हे येँय् छगू तःजिगु ज्याझ्वलय् प्रधानमन्त्री पुष्पकमल दाहालं औपचारिक सुभारम्भया घोषणा याइगु ज्याझ्वः तयातःगु दु ।
प्रादेशिक भाषा विधेयक पारित जूगु १८० न्हु क्यंकुन्हुंनिसें सरकारी ज्याकुथी विधेयक लागू जूगु आभाष जुइक बैधानिक ज्या छु यायेगु थ्व बैठकं क्वछ्यूगु दु व धाःसा सिइ मदुनि ।
किपा: बुखँ
